Ilinniartitsinissamut Qinnutit Pilersaarutip Guuterpaluttup Allagaanit (#9115)

*Una qinnut ullut tamaasa atuarneqartariaqarpoq. . .

Guuti-aa! Guuti-aa! Una tassa timmiaq isarorsimasoq, timmineralu arriitsorujussuuvoq – ikioruk, timmisinnaaqqullugu pilluarnerup annaassinerullu qaqqaasa inngiinut aammalu nuannaangaarnermik qiimasunnermillu naassaanngitsukkut timminini aaqqillugu, erinarsuutini qullarlugu Atinni sunit tamanit anginersaasumi siutit nuannaartillugit isillu akisutsilerlugit aqqutissiuinermut ilisarnaatinik takunninnikkut.

Naalagara! Kisimiippunga, kiserliorlunga annikitsuullungalu. Uannut allamik tapersersuisoqanngilaq Illiunngitsumik, allamillu ikiuisoqarani Illiunngitsumik, atasoqarsinnaanngilarlu Illeqartinnak. Kiffartuunnerni nukittorsannga Inngilivillu katersaarsuit ikiorlinnga Oqaatsivit siaruarterniarnerannik ajugaasinnaanngoqqunnga Ilisimassutsillu pinngortitavit akornanni oqaatigilara.

Ilumut sanngiitsut ikiortigaatsit, minnerusunillu Illersortaallutit, ilumullu tassaavutit Pissaanilik, Annerpaaq, Ajugaaffigineqarsimanngisaannartoq.

-`Abdu'l-Bahá
-----------------------

Ilinniartitsinissamut Qinnutit Pilersaarutip Guuterpaluttup Allagaanit (#9116)

*Kialuunniit sumulluunniit ilinniartitsiartorluni angalasup, qaqqakkoortup, inoqajuitsukkoortup, nunakkoortup immakkoortullu qinnut inna atuaqqissaarliuk.

Guuti-aa! Guuti-aa! Pinngortiavit saavanni sanngiissusera nikanassusera maniguuttuussuseralu isigaat, taamaattorli Illit tatigisimavakkit Ilinniutivillu kiffavit nukittuut akornanni siammarnissaa pillugu Nukittussutsit Pissaanerillu tunaaralugu nikuissimallunga!

Naalagaq-aa! Tassaavunga timmiaq isarorsimasoq Illit qilanni isoqanngitsumi aarsaarumasoq. Qanoq ilillunga taamaasiorsinnaavunga Isumassuinerit, Saammaannerit, Nakussatsitsinerit Ikiuinerillu aqqutiginngikkukkit?

Naalagaq-aa! Sanngiissusera nallittuuguk Pissaanerillu atorlugu nakussatsinnga. Naalagaq-aa! Nukillaanganera naakkiguuk Nukittussutsit Ataqqinassutsillu aqqutigalugit ikiunnga.

Naalagaq-aa! Anersaap iluartup anersaarnerata pinngortitat sanngiinnersaat nakussatsissagaluarpagu, kipisaffigisanilu tamaasa angussagaluarpai, kissaatigisanilu tamaasa pigilissagaluarlugit. Ilumummi qangarsuaaniilli Kiffatit ikiorsimavatit, naallu taakku Pinngortitavit sanngiinnersarisimagaluarai Kiffavillu akornini nikanarnerpaajusimagaluartut, nunamilu inuusuni annikinnerpaajusimagaluartut, Akuerinninnerit Pissaanerillu aqqutigalugit Innuttavit nersornarnerpaat inuiassuarnilu ileqqorinnerpaanit salliutinneqarsimapput. Naak siornatigut sullinertut issimagaluartut kissaviarsuttut ataqqinartutut ilersimapput, naallu siornatigut kuunnguatut issimagaluartut, Illit tunisinikkut naakkinnissutsikkullu imarsuartut ilersimapput. Saammaassinerillu sunit tamanit anginersaasoq aqqutigalugu ullorissatut siunnersuinerup killingiusaani qinngortutut ilersimallutik, timmissatut toqusuissutsip naatsiiviani naasorpassualinni qarlortutut, løvitut ilisimassutsip paasisimasaqassutsillu orpippassuini qatimaluttutut, arfertut inuunerup imavissuini aqqaamasutut ilersimallutik.

Ilumut, Tassaavutit Sallaatsoq, Pissaanilik, Angisooq, Naakkinnittunit Naakkinninnerpaaq.

-`Abdu'l-Bahá
-----------------------

Ilinniartitsinissamut Qinnutit Pilersaarutip Guuterpaluttup Allagaanit (#9118)

Guuti-aa, Guutiga! Isigaat qanoq taarnersuup nunat tamaasa ulissimagai, nunat tamarmik qanoq akersuunnerup inneranik ikumatiginersut, sorsunnerullu aammillu kuisinerup innera Kangiani Kitaanilu ikumasorsuusoq. Aak kuuppoq, timit nunamut eqqagaapput, niaquinnaallu akiuuffiup pujoralaanut nakkartarput.
Naalagaq-aa! Ilisimaatsut taakkua nalligikkit Isigikkillu isumakkeerfiginninnerup ajortinillu isumakkeerinerup isaanik. Inneq taanna qamiguk, taamaalilluni nuissat ussissut killingusaamik taartitsisut akullarniassammata. Piviussutsip Seqerna qinngorneqalerli saammaateqatigiinnerup qinngornerinik, taarnersuaq maanna peersitaali eqqissinerullu qaamanera alanngialasoq nunanut tamanut qinngorneqalerli.
Naalagaq-aa! Inuit uumissuinerup akeqqersimaarnerullu imaanit itisoorsuarmit qaqitikkit taarnersuarmillu isigisaqarfiunngitsumit aniguisikkit. Uummataat peqatigiilersikkit isaallu eqqissinerup saammaateqatigiinnerullu qaamanerinik nuannaaruteqalersikkit. Sorsunnerup aammillu kuisinerup qunnersuanit annaatikkit kukkuluttornerullu taarneranit qilerussaajakkit.
Isaannit saagoq peeruk uummataallu siulersuinerup qaamasuanik qaammarsakkit. Iliorfigikkit Illit nallituininnik saamasumik misigittassutsinnillu, naapertuilluarnerit kamannerillu pissaanilissuit avataannik sajulersitsisoq atornagit.
Naalagaq-aa! Sorsunnerit nangipput. Aliasunneq annilaanganerlu sakkortunerulerput, nunalu ineriartorluarsimasoq sunaluunniit piuneerussaavoq.
Naalagaq-aa! Uummatit artorsarput tarningillu navialisimapput. Tarningit nallinnartut taakkua nallittuutikkit, namminnerlu imminni suli annerungaartumik pigiumasaqarniarnerannut asiginnaqinagit.
Naalagaq-aa! Tarningit nikanartittut naalattullu Illit nunanni saqqummerlik kiinaat siulersugaanerup qinngorneranit qaammarsagaallutik, silarsuarmit qilersugaanatik Illit atinnik nersorinninnerminni, Ilinnik unnersiutiginnipput Illernassutsivillu Tikka naamajuminartoq inuiassuarnut siaruarterlissuk.
Naalagaq-aa! Qatigaat nakussatsikkit, makisiilu nukimmik tunikkit uummataallu pilluartunngortikkit Illit asanninnerpit nalunaaqqutaanit pissaanerpaamit.
Naalagaq-aa! Ilumoortumik, sanngiitsuupput, Illillu tassaavutit Pissaaneqarluartoq, taanna Pissaasoq; pissaaneqanngillat, Illit tassaavutit Ikiortaasoq aamma Nallittuisoq.
Naalagaq-aa! Akerliuniarnerup imarsua qapuppoq, anorersuillu taakku qatsornavianngillat taamaallaat Illit saammaannikkut killeqanngitsukkut nunanik tamanik nalaassisukkut.
Naalagaq-aa! Ilumut, inuit pileritsaassaqarsutsip qunnersuani ipput, allamillu annaassisissaqanngillat taamaallaat Illit saamaannikkut tunissutinnik killeqanngitsutigut.
Naalagaq-aa! Pileritsaassat ajortut tamakkua taarmik siaruaaffigikkit uummatilli qaammarsakkit Illit asanninnerpit qullianik ungasinngitsukkut nunanik tamanik qaammarsaajumaartukkut. Annerusumilli Asasatit nukittorsakkit, taakkua Illit kusanassutsinnik asanninnertik peqqutigalugu nunaminnik, ilaquttaminnik meeqqaminnillu qimatsisut, nunanullu takornartanut aallarsimasut Illit tipiginnerit naamajuminartoq siaruarteriartorlugu Ajoqersuutillu siammartikkumallugu. Kiserliornerini Illit tassaagit taakkua ingiallortaat, nunami takornartami ikiortaat, aliasuutaannik piiaasoq, pilluaannerannilu tuppallersaasoq. Imerusunneranni imigassaagit inuummarissinartoq, nappaataannut katsorsaataagit peqqissinartoq uummataasalu ikumallutik kissarulunneranni nipaallisaataasoq.
Ilumoortumik, Illit tassaavutit Tukkornerpaasoq, Naalagaq saammaalluartoq, aammalu ilumoortumik Illit tassaavutit Misigittarnerpaaq Nallittuinerpaasorlu.

-`Abdu'l-Bahá
-----------------------

Ilinniartitsinissamut Qinnutit Pilersaarutip Guuterpaluttup Allagaanit (#9122)

*Qinnut tulliuttoq ilinniartitsisunit ikinngutinillu ullormut ataasiarluni Atuarneqartassaaq.

Illit-aa Naalagaq ajunngitsoq! Unnersiutigineqarit, Illit siulersuinerup aqqutaanik nerutuumik ajoqersuukkatsigut, kunngeqarfiup matui ammarsimagakkit Piviussutsillu Seqernatigut Illit saqqummersimagavit. Tappiitsut isigisaqalersissimavatit, tusilartut tusaasinnaalersillugit, toqusimasut uummarteqqissimavatit, piitsut 
 isuunngortissimallugit, tammartajaartut aqqummik ajoqersuussimavatit, panertunillu siggullit siulersorsimallugit
siulersuinerup puilasuanut, aalisagaq imeruttoq piviussutsip imaanut anngutsissimavat, timmissallu nikittartut saammaannerup ruusaanik naatsiivianut qaaqqullugit.

Illit-aa Ajugaqanngitsoq! Uagut tassaavugut Illit kiffatit aamma piitsuutitit, ungasippugut Illit najuinissannik anguniagaqarluta, imerusuppugut imermik Illit puilasunnit pisumik, napparsimavugut katsorsaanissallu qilanaaralutigu. Illit aqqusinnersimanikkut ingerlavugut, allamillu anguniagaqanngilagut neriuuteqaratalu taamaallaat Illit tipigissutsinnik siaruarterinissaq, tarningit tamarmik torlulaarut manna qullartinniassammassuk ”Guuti-aa, aqqummut narlusuumut ingerlatsigut.” Isaat uisitaalittoq qaamaneq takoqqullugu, ilisimaatsussutsip taarneranit aniguisitaalittoq. Qanortoq Illit siulersuinerpit qullianut katersuullik. Qanortoq kinaluunniit tigummisaatsoq pissarsiassamik pili. Qanortoq sumiginnakkat tassaalerlik Illit tupinnartuliannik ilisimanneqataalersut. Ajugaqanngitsoq-aa! Nallittuissutsivit qiviarnerinik isigitigut. Uppernarsagaanermik qilammeersumik tunisigut. Anersaannit Illernartumit anersaarnermik tunisigut Ilinnut kiffartornitsinni ikorfartugaaniassagatta, ullorissatullu qaamasutut nunani makkunani Illit siulersuinerpit qaamasuanik Saqqarneqarniassagatta.

Ilumut, Illit tassaavutit Pissaaneqarluartoq, Pissaasoq, Ilisimasoq Takunnittorlu.

-`Abdu'l-Bahá
-----------------------

Ilinniartitsinissamut Qinnutit Pilersaarutip Guuterpaluttup Allagaanit (#9124)

*Kikkulluunniit Guutip tipigissusianik naamajuminartumik siaruarterisut ullaat tamaasa qinnut inna oqaatigisarlissuk.

Naalagaq-aa, Guutiga! Unnersiutiginninneq qujassuteqarnerlu Ilinnut saatillakka, Illit aqqummut silittumut Kunngeqarfinnut atasumut siulersorsimagamma, aqqusinnersimanikkullu isorartuukkut narlusuukkullu ingerlatissimallunga, Qaamaninnit qinngornermik tupinnartumik isera takunnitsillugu qaammarsarsimagakku, siutiga tupinnartuliat kunngeqarfianni Illit illernassutsivit timmiaasa nipaannut saatissimagakku, uummatigalu Illit asanninnikkut naapertuilluartut akornannut 
 ajungilersillugu.

Naalagaq-aa! Anersaakkut Illernartukkut uppernarsaqqiiffiginnga, Illit Atikkut nipera naalagaaffiit akornanni oqaaseqartissinnaaqqullugu aammalu Illit kunngeqarfippit saqqumernera pillugu nalunaarutit nuannersut inuit akornannut tunniussinnaaqqullugit.


Naalagaq-aa! Sanngiitsuuvunga, Illit nukittussutsikkut pissaanikkullu nakussatsinnga. Oqara ilaginnaavoq, Illit unnersiutigineqarnissannik eqqaaneqaatissannillu oqalullanga. Nikanartuuvunga, Illit Kunngeqarfinnut isersinnaanissannik ataqqinarsitinnga. Ungasippunga, Nallittuissutsivit alloriusaa qanilliartorlara. Naalagaq-aa! Qullertut qaammarissutut ilersinnga, ulloriaalanga uisorilasoq, orpillu pilluaqqusaasoq inerittunik avalequtinillu pinnersagaq nunanillu makkuninnga alanngiisoq. Ilumut tassaavutit Pissaasoq, Pissaaneqarluartoq Akornusigaanngitsorlu.

-`Abdu'l-Bahá
-----------------------

Ilinniartitsinissamut Qinnutit Pilersaarutip Guuterpaluttup Allagaanit (#9117)

Illit-aa Guuti asseqanngitsutit! Illit-aa Naalagaaffiup Naalagaa! Tarnit makku tassaapput Sakkutuutit qilammiorpaluttut. Ikiukkit, Katersaarsuillu qutsinnerpaat ataatsimoortitat aqqutigalugit ajugaasinnaanngoqqukkit, taamaalillutik ataasiakkaarlutik amerlasoorsuartut ilerniassammata, nunallu makku Guutip asanninneratigut ilinniutillu guuterpaluttut qaammarsaanerisigut tiguarniassammatigit.

Guuti-aa! Illit tassaagit tapersersortaat ikiortaallu, inoqajuitsumi, qaqqami, qooqqumi, orpippassuarni, narsaannarsuarni imarsuarnilu Illit tatigisarilitsit – taamaalillutik Naalagaaffiup pissaaneratigut, Anersaallu Illernartup anersaarneratigut nipitik qullarniassammatigit.

Ilumut, Tassaavutit Pissaanilik, Angisooq tamanit Anginersaasoq, Tassaavutillu Ilisimasoq, Tusaasoq Isigisorlu.

-`Abdu'l-Bahá
-----------------------

Ilinniartitsinissamut Qinnutit Pilersaarutip Guuterpaluttup Allagaanit (#9123)

*Kinaluunniit naalagaaffinni makkunani illoqarfitsigut nunaqarfitsigullu angalasoq Guutillu tipigissusianik naamajuminartumik siaruarterinissamik ilungersuuteqartoq ullaat tamaasa qinnummik uannga atuartassagaluarpoq.


Guutiga-aa! Guutiga-aa! Nikanassutsinni sanngiissutsinnilu isigaarma

suliassamik annerpaamik ilungersuuteqartunga, aalajangersimallunga Illit

oqaatsivit inuiassuarni oqalliserinissaa Ajoqersuutillu Illit innuttavit akornanni siammarternissaa. Qanoq ililluni uannut iluatsissinnaava Illit Anersaavit Illernartup anersaarneranit tapersersorneqanngikkuma, Illit Kunngeqarfinnit nuannersumit sakkutoorpassuarnit ajugaanissamut ikiorneqanngikkuma, Illillu uppernarsaanitit uannut aqqartinngikkukkit, Taannatuaasutit ippernamik nattoralinngortitsisinnaasoq, kuseriarnermik kuussuanngortitsillunilu imanngortitsillunilu, suarsunnguamillu qaamaninngortitsillunilu Seqininngortitsisinnaasoq?

Naalagara-aa! Pissaaninnik ajugaagajuttumik sunniilluartartumillu

ikiunnga, oqara Ilinnik nersorinnissummik appinniassammat, inuiannilu tamani Illit piginnaassutsinnik unnersiutiginninniassammat aammalu tarnigalu Illit asanninnerpit ilisimassutsivillu viinnianik nuannaaruteqangaarniassammat.

Illit tassaavutit Ajugaqanngitsoq, Namminerlu piumasaminik

iliorsinnaasoq.

-`Abdu'l-Bahá
-----------------------

